HOME
Katiba yakoleza kasi urais CCM
Dar es Salaam. Siku chache
baada ya Bunge Maalumu kupitisha Katiba Inayopendekezwa, mchuano wa
urais ndani ya CCM umeshika kasi baada ya makada wanaowania nafasi hiyo
kujihakikishia uzito wa madaraka wanayoyatafuta.
Mjadala wa Katiba ulikuwa umewaweka njiapanda
makada hao, baadhi wakiwa wameshajitangaza na wengine wakijipanga
chinichini, huku wakijiuliza wawanie urais upi; wa Muungano, Tanganyika
au Zanzibar (kwa Wazanzibari), lakini sasa ni kama wamefunguliwa njia.
Hata hivyo, utaratibu wa watu kujitokeza licha ya
kwamba ni haki yao, umekosolewa ukielezwa kuwa kama hakutakuwa na sifa
maalumu, mchakato huo unaweza kumalizika kwa kupata mgombea
asiyestahili.
Wengi wa makada wanaojitokeza na kutajwa ambao
gazeti hili limewahi kuzungumza nao katika mahojiano maalumu,
walionyesha wazi kuunga mkono serikali mbili dhidi ya tatu zilizokuwa
zimependekezwa na Tume ya Mabadiliko ya Katiba chini ya Jaji Joseph
Warioba.
Ingawa baadhi yao hawakutaka kuweka bayana, habari
zilizobainika katika makundi yanayowaunga mkono ni kuwa walikuwa
wanaona serikali tatu zingeondoa madaraka makubwa aliyonayo Rais wa
Muungano wa sasa katika muundo wa serikali mbili.
Jambo jingine lililokuwa linawakatisha tamaa
makada hao ni hoja ya kutaka madaraka ya Rais yapunguzwe kwa kiwango
kikubwa, iwapo ingepita ingeweza kuwakosesha uwezo wa kulipa fadhila kwa
wanaowaunga mkono.
“Unadhani nani angetaka kuwa Rais wa Tanzania Bara
pekee au awe Rais wa Muungano asiyekuwa na mamlaka Bara,” alisema kada
kundi la mmoja wa wagombea.
Kutokana na hofu hiyo, nguvu za wagombea hao
zilielekezwa kwanza kwenye Katiba ili kuhakikisha madaraka wanayoyasaka
yanalindwa, ndipo waanze upya mchuano.
Taarifa zilizochapishwa kwenye vyombo vya habari
juzi kuwa makundi ya wagombea yalikuwa yanapishana Dodoma kugawa fedha
kushawishi uungwaji mkono wa wajumbe wa Halmashauri Kuu ya Taifa (NEC),
zinaelezwa kuwa ni sehemu ya mchuano huo kushika kasi upya.
Kulikuwa na taarifa kuwa ingeibuliwa hoja ya
kutaka wagombea wengine wabanwe na chama kwa kupiga kampeni, zaidi ya
lile kundi la makada sita waliokwishapewa onyo kali na chama hicho.
Makada waliopewa onyo hilo ni mawaziri wakuu wa
zamani, Edward Lowassa (61) na Frederick Sumaye (64) na Waziri wa Mambo
ya Nje na Ushirikiano wa Kimataifa, Bernard Membe (61).
Wamo pia Waziri wa Nchi, Ofisi ya Rais (Uhusiano
na Uratibu), Stephen Wasira (69), Naibu Waziri wa Mawasiliano, Sayansi
na Teknolojia, January Makamba (40) na aliyewahi kuwa Waziri wa Nishati
na Madini, William Ngeleja (47).
Wana-CCM wengine wanaotajwa kuwania nafasi hiyo ni Waziri Mkuu
Mizengo Pinda (66), Waziri wa Ushirikiano wa Afrika Mashariki, Samuel
Sitta (72), mbunge wa Nzega, Dk Hamis Kigwangalla (39), Naibu Waziri wa
Fedha, Mwigulu Nchemba (39) na Waziri wa Nchi, Ofisi ya Rais (Kazi
Maalumu), Profesa Mark Mwandosya (65).
Pia yumo mbunge wa Songea Mjini, Dk Emmanuel
Nchimbi (43), Rais wa Zanzibar, Dk Ali Mohamed Shein (66), Makamu wa
Rais wa Jamhuri ya Muungano, Dk Mohamed Gharib Bilal (69) na Waziri wa
Sheria na Katiba, Dk Asha-Rose Migiro (58).
Haki kuonyesha nia
Akizungumzia mbio hizo za urais kwa upande wa CCM
na vyama vya upinzani, aliyekuwa makamu mkuu wa Chuo cha Mt. Augustino
Mwanza (Saut), Dk Charles Kitima alisema walioonyesha nia na wanaotajwa
wana haki kikatiba ya kuongoza nchi.
Alisema pamoja na kwamba wanaojitokeza wana haki,
utaratibu unaotumika sasa haueleweki tofauti na miaka ya nyuma, vyama
ndivyo vilivyokuwa vinapendekeza watu watakaogombea.
Alisema utaratibu huo unaonyesha kuwa nchi inakosa
sifa ya viwango vya juu vya urais kwa kuwa kujitokeza kwa wingi huo
kunazua maswali mengi na inatia wasiwasi.
Dk Kitima alisema ni lazima kuwe na sifa ya urais kwani atasaidia kwa watu kutokujitokeza au kujitokeza kama ilivyo sasa.
Alisema: “Viongozi wengi wanatafuta urais kwa
ajili ya uchumi wa familia zao badala ya Taifa, hivyo wananchi lazima
waeleweshwe.”
Chapisha Maoni