DUNIA YETU

HOME

Kikwete- Tumshukuru Mungu

Rais wa Jamhuri ya Muungano wa Tanzania Dkt.Jakaya Mrisho Kikwete na Rais wa Serikali ya Mapinduzi ya Zanzibar Dkt.Ally Mohamed Shein walioinua rasimu ya katiba muda mfupi baada ya kukabidhiwa na aliyekuwa mwenyekiti wa bunge maalum la katiba Mh.Samwel Sitta

RAIS Jakaya Kikwete amesema, tukio la kukabidhiwa Katiba Inayopendekezwa ni muhimu na la kihistoria linalokidhi matakwa ya Sheria, alisema kukamilika kwake kunabakiza hatua moja ya mwisho ya wananchi wote kupiga kura ya maoni kufanya uamuzi wa katiba mpya.

“Tumshukuru Mwenyezi Mungu kwa hapa tulikofikia,…hakika Mungu anaipenda nchi yetu,” alisema na kumpongeza Mwenyekiti wa Bunge Maalumu la Katiba, Samuel Sitta na Makamu wake, Samia Suluhu Hassan kwa kazi waliyoifanya pamoja na wajumbe wengine kukamilisha kazi hiyo kwa kiwango cha juu.

Alisema, “haikuwa kazi rahisi hata kidogo, kulikuwa na milima na mabonde, na wakati mwingine mawimbi ambayo yalikuwa makali yalielekea kuwa tufani.” Alisema mchakato wa katiba mpya ni jambo jema aliloanzisha kwa nia njema ingawa lilipokewa kwa hisia tofauti.

Alisema wapo walioona kwamba halitawezekana lakini yeye alibaki kuwa mmoja wa walioamini kwamba litawezekana. Kwa mujibu wake, Desemba 31, 2010 alipotangaza dhamira ya kuanza mchakato wa katiba, ilipokewa kwa hisia tofauti; kwa maana wapo waliunga mkono moja kwa moja, wapo waliopinga na waliobaki katikati.

Akisimulia, alisema jambo ambalo wengi hawalifahamu, miongoni mwa makundi yaliyopinga yalikuwamo pia ndani ya Chama Cha Mapinduzi (CCM).

“Nakumbuka walikuwapo baadhi ya watu waliodiriki hata kulihoji na kuniambia kuwa wewe jambo hili umelizua wapi?...Hii si ajenda ya CCM bali ni ya watu wengine.” Alisema aliwaambia hiyo ni ajenda ya Watanzania na kwamba yeye ndiye mwaklishi wao mkuu ambaye ana dhamana hiyo.

“Nashukuru Mungu baada ya mjadala mkali, tukaelewana,” alisema na kuendelea kusimulia kwamba, “walikuwepo pia watu walioondoka pale shingo upande wakisema jamaa anaingiza jambo ambalo si letu”.

Kwa mujibu wa Rais Kikwte, baadhi ya waliokuwa wakali kwenye NEC na Kamati Kuu ya chama, aliwateua kuwa wajumbe wa Bunge Maalumu la Katiba ambao hata hivyo, alisema anafurahi kwamba watu hao wamekuwa msaada na kutoa mchango mkubwa uliowezesha bunge kupendekeza katiba iliyo nzuri.

Alisema hatimaye wameelewa hoja na haja ya kuandika katiba mpya; ulioanza mwaka 2011 kwa Serikali kuandaa Muswada wa Sheria ya Mabadiliko ya Katiba ambao ulijadiliwa na kupitishwa Novemba 18, 2011.

Changamoto nyingine alizosema ni ‘sintofahamu’ iliyojitokeza kwenye Bunge ambayo baadhi ya wabunge walisusa wakitaka Rais asiridhie muswada wa sheria hadi hapo yatakapofanyika marekebisho waliyoona wao ni muhimu. Wakakubaliana kuwa kila chama kilete mapendekezo ya marekebisho wanayoona yanafaa yafanyike.

Wakawa na kamati ya pamoja kati ya serikali na wao, wakachambua moja baada ya jingine wakakubaliana kuwasilisha kwenye bunge.

Akizungumzia mara nyingine baadhi ya wabunge (Ukawa) kususa, Rais Kikwete alisema wabunge waliobaki na hasa wengi wao wakiwa wa CCM, walikuwa wakimwambia safari hii asikutane nao, awaache kwamba kazi wataifanya na kumaliza bila ya wao.

“Niliwasikiliza lakini nikafanya uamuzi wa kiuongozi; kwamba lazima tufanye jitihada shughuli hii tuifanye wote tuimalize wote,” alisema.

Aidha, alisema kutokana na mchakato wa bunge kukumbwa na malumbano ya mara kwa mara, pia alikuwa akishauriwa ikiwamo kupokea meseji nyingi zilizomtaka avunje Bunge Maalumu la Katiba.