DUNIA YETU

HOME

Kura za Zanzibar ni pasua kichwa

Dar es Salaam. Suala la akidi ya wajumbe wa Bunge Maalumu kutoka Zanzibar linazidi kusumbua vichwa vya uongozi wa Bunge hilo kiasi cha kusababisha wasiwasi mkubwa kuhusu hatima ya Rasimu ya Katiba inayopendekezwa.

Uchunguzi wa gazeti hili umebaini kuwa hadi jana, ni wajumbe 143 tu kati ya 219 kutoka upande huo waliokuwa wamepiga kura, huku wajumbe 86 wakiwa bado hawajatimiza haki yao hiyo ya kidemokrasia.

Kati ya wasiopiga kura, 66 ni wajumbe wa Umoja wa Katiba ya Wananchi (Ukawa) ambao walisusia Bunge hilo Aprili 16, mwaka huu kutokana na kile walichodai kuwa ni kutoridhishwa na jinsi Bunge linavyoendeshwa, wakati wajumbe 20 hawajapiga kura kutokana na sababu mbalimbali zikiwamo za kwenda kuhiji Saudi Arabia.

Jana asubuhi, Mwenyekiti wa Bunge Maalumu, Samuel Sitta alisema licha ya njama zinazofanywa na watu kukwamisha rasimu hiyo isipate kura za kutosha, mipango yao haitafanikiwa kwani kulikuwa na kila dalili kwamba kazi hiyo ingehitimishwa kwa ufanisi.

Hata hivyo, uchambuzi wa kitakwimu unaonyesha kuwa kulikuwa na kila dalili ya kukosekana kwa theluthi mbili ya kura zinazotakiwa kwa mujibu wa sheria kwa upande wa Zanzibar kwani kati ya 143 ya waliopiga kura, saba kati yao walipiga kura ya ‘hapana.’

Kadhalika, wajumbe wawili akiwamo Mwanasheria Mkuu wa Serikali ya Mapinduzi Zanzibar, Othman Masoud Othman walipiga kura wakikataa baadhi ya ibara, wakati kura za ‘ndiyo’ zilikuwa 105.

Kitendawili kinachosubiriwa kilikuwa ni kuhusu kura 30 za siri ambazo hadi jana matokeo yake yalikuwa hayajawekwa wazi, huku kukiwa hakuna taarifa zozote kuhusu kura zilizotarajiwa kupigwa na wajumbe 20 ambao hawapo Dodoma.

Awali, kulikuwa na mpango wa kuwawezesha wajumbe hao kupiga kura huko waliko na uongozi wa Bunge Maalumu ulikusudia kupeleka ofisa wake, Makka, Saudi Arabia ili kuwawezesha wajumbe wake wanane ambao ni mahujaji kupiga kura wakiwa huko.

Ili kupata theluthi mbili, zinatakiwa kura 146, idadi ambayo kutimia kwake kwa mujibu wa takwimu zilizopo hadi sasa zinatakiwa kura nyingine za ‘ndiyo’ 14.

Kwa maana hiyo hata kama kura zote za siri 30 zitaunga mkono rasimu hiyo, bado haziwezi kuiwezesha kupata kura zinazotakiwa kwani zitafikia 135, hivyo kuendelea kuwapo pengo la kura 9 ili kufikisha kura 146.

Msako wa kura

Kutokana na mazingira hayo, habari zilizolifikia gazeti hili juzi na jana zinasema kulikuwa na jitihada kubwa za kuwashawishi baadhi ya wabunge wa Ukawa wapige kura.

Waliotajwa kulengwa na mpango huo ni wabunge wa Viti Maalumu (Chadema) kutoka Zanzibar, Maryam Msabaha na Mwanamrisho Abama ambao jana kwa nyakati tofauti, walithibitisha kusakwa.

“Kweli nimesumbuliwa sana na watu ambao siwezi kuwataja na wananitaka nipige kura na wengine walifika mpaka nyumbani lakini mimi siwezi kushiriki maana nikifanya hivyo dhamiri yangu itanishtaki,” alisema Msabaha.

Abama alisema: “Nimepewa alert (ilani) na viongozi wangu kwamba nasakwa, kwa hiyo nimekaa ndani tu wala sitoki maana sina uhakika hao wanaonisaka wana malengo gani. “Hata simu sipokei anapokea mume wangu tu, sema tu kwamba hivi katoka hivyo ilipoingia nikasema basi ngoja nipokee, lakini jambo moja ni kwamba hata kama hao wanaonitafuta wangenipata, siwezi kushiriki kupiga kura kwa kitu ambacho sijashiriki kukiandaa.”

Jana, Sitta alitoa taarifa bungeni akisema kuna wajumbe wawili waliokuwa wamegomea Katiba hiyo na kwamba baada ya kusoma rasimu inayopendekezwa wamekubali kupiga kura.

“Mmoja amekubali kupiga kura na anasema yuko tayari hata kufukuzwa na chama chake, sasa wale wanaotumia mbinu za ovyoovyo ili mchakato huu usikamilike wanapoteza muda, maana ukizuia maji huku, yanaelekea kwenye mkondo mwingine,” alisema.

Sitta alikuwa akizungumzia mchakato wa upigaji kura huku akirejea ujumbe alioandikiwa na Mwanaidi Othman Tahiri ambaye alilalamika kwamba jina lake limerukwa na baadaye alipiga kura ya ‘hapana.’

“Mwenyekiti wake wa chama cha NRA, alikuwa ameniandikia kuwa mjumbe huyo alipopiga kura ya ‘hapana’ alikuwa hakuelewa maana yake, kwa hiyo alisema pengine tukae naye aweze kuelimishwa vizuri,” alisema Sitta.

Alisema mjumbe mmoja ambaye jina lake analihifadhi, alikuwa akimshikilia Mwanaidi kama mfungwa wake na alikuwa akifanya kazi kubwa ya kuhakikisha zinapigwa kura za ‘hapana’ kutoka Zanzibar.

Vitisho

Sitta pia alidai kwamba baadhi ya wajumbe juzi waliokolewa na uongozi baada ya kuzuiwa hotelini mwao ili wasiende kupiga kura.

“Jana (juzi), ilibidi tutumie mamlaka za kiusalama kumkomboa mjumbe aliyekuwa amefungiwa hotelini ili asije kupiga kura, hatimaye tuliweza kumkomboa na akaja kupiga kura ya siri,” alisema Sitta.

Katika tukio la pili, alisema kuna wajumbe wawili juzi walifika kwa Katibu wa Bunge hilo na kuonyesha ujumbe mfupi wa simu za mkononi (sms), wenye vitisho na kwa kuwa waliogopa ilibidi Katibu awaruhusu kuondoka... “Wametishwa sana kwamba wasiendelee kubaki hapa Dodoma na sasa wameondoka, lakini vitisho pia ni jinai.”

Alihoji watu wa aina hiyo wanachokitafuta hadi kutumia mbinu alizoziita za kimafia wana lengo gani na nchi yao.

Kama bado haujalike page yetu ya Facebook unaombwa kulike ili kila linatufikia tukujuze wewe msomaji wetu pia tufuate kwenyeTwitter