DUNIA YETU

HOME

Afrika ipigane kutokomeza umasikini

AKIWA ziarani nchini Marekani, Rais Jakaya Kikwete amesema pamoja na changamoto nyingi ambazo Bara la Afrika inakumbana nazo, bado kuna uwezekano wa kuondoshwa kwa umasikini katika bara hilo.

Akitoa hotuba kwenye mkutano unaojadili Maendeleo na kumaliza Umasikini, ulioandaliwa na Shirika la Misaada la Marekani (USAID), jijini Washington juzi, Rais Kikwete alisema Afrika ikiwa na sera sahihi na ushirikiano mzuri baina ya serikali na sekta binafsi, umasikini utaondoka.

Akiunga mkono kauli hiyo ya Rais Kikwete, Waziri wa Mambo ya Nje wa Marekani, John Kerry, alimwelezea Rais Kikwete kuwa ni kiongozi mtendaji na ambaye amechangia katika kuleta amani katika nchi za ukanda wa Maziwa Makuu na kukuza utawala bora nchini Tanzania.

Mathalani, akiizungumzia Tanzania, Rais Kikwete alisema mafanikio ya kiuchumi yameanza kuonekana baada ya kutangazwa kwa mageuzi ya kiuchumi kwenye miaka ya 1980, mageuzi ambayo yamedumu na kuonesha mafanikio makubwa hadi sasa.

Alisema kupitia mageuzi hayo, uchumi umekua kutoka asilimia 3.5 mwaka 1990 hadi kufikia kiwango cha asilimia 7 katika kipindi cha miaka 10 iliyopita.

Hata hivyo, alisema kiwango hicho cha uchumi bado hakiridhishi kwa sababu sekta muhimu ya kilimo ambayo ndiyo inayotoa ajira kwa Watanzania wengi, haijakua na kuendelea vya kutosha na badala yake sekta zinazohusika na utoaji huduma, mawasiliano, ujenzi, uzalishaji na madini ndizo zimekua zaidi.

Tuonavyo sisi, ni ukweli ulio wazi kwamba Bara la Afrika lina uwezo mkubwa wa kuondosha umasikini pamoja na changamoto mbalimbali zinazolikabili bara hilo, endapo kutakuwa na mikakati madhubuti.

Tunasema hivyo kutokana na mafanikio ambayo yameanza kujitokeza katika Mataifa mbalimbali ya Afrika baada ya kuzifanyia mageuzi makubwa Sera zao zinazosimamia ukuzaji uchumi na hasa kutokana na sasa kuamua kutumia rasilimali za ndani katika kuinua uchumi wa nchi hizo.

Kama alivyosema Rais Kikwete, jambo muhimu na ambalo linapaswa kupewa kipaumbele kikubwa katika mikakati ya kukuza uchumi wa Bara la Afrika, ni kuhakikisha kuwa Sera zinazoundwa kusimamia uchumi zinakuwa bora na sahihi lakini pia kunakuwa na ushirikiano mkubwa baina ya sekta ya umma na binafsi.

Tunafahamu kwamba si nchi zote za Afrika zinakabiliwa na umasikini kutokana na kukosekana kwa uwezo wa rasilimali watu au rasilimali fedha, kwani zipo zenye uwezo huo lakini zinashindwa kufanikiwa kutokana na kukosekana kwa utashi wa kisiasa kwa viongozi katika kuongoza mapinduzi ya kiuchumi.

Ni kwa sababu hiyo ndio maana Serikali ya Marekani kuanzia mwaka 2000 ilianza kutoa zawadi kwa nchi masikini zinazoonesha jitihada za kujikomboa kiuchumi kwa kuzipatia miradi ya Millennium Challenge Account (MCA) kwa lengo la kuziunga mkono ili ziongeze juhudi na kasi zaidi lakini pia kuzifanya nyingine kuiga.

Kwa nchi kama Tanzania mafanikio ya ukuaji wa uchumi yamejidhihirisha na ndio maana ilikuwa moja ya nchi zilizonufaika na miradi ya MCC ambayo ukomo wake ni mwakani, lakini ikiwa tayari imeahidiwa kupewa awamu ya pili ya miradi hiyo kutokana na namna ilivyosimamia utekelezaji bora wa miradi hiyo ya maendeleo na ile ya kijamii.