DUNIA YETU

HOME

Siasa uchwara ni hatari kwa nchi'

WASOMI, wanadiplomasia na viongozi wa dini wameasa wanasiasa kuwa makini na usalama wa taifa kwa kuhakikisha tofauti za vyama vyao, hazidhoofishi utaifa na maslahi ya nchi. Wamehadharisha juu ya kile kilichoitwa ‘siasa uchwara’ na propaganda, wakisema ikifika hatua ya wanasiasa kuonesha tofauti hadharani juu ya masuala yanayogusa maslahi na usalama wa nchi, ni jambo la hatari na haileti picha nzuri usoni mwa mataifa mengine.

Hoja hizo zimetolewa na watu hao wa kada tofauti wakati wakizungumzia yaliyojiri bungeni juzi wakati Waziri wa Mambo ya Nje na Ushirikiano wa Kimataifa, Bernard Membe alipowasilisha bajeti yake iliyopitiwa.

Kambi ya Upinzani Bungeni kupitia kwa Msemaji wa wizara hiyo, Ezekiah Wenje, katika sehemu kubwa ya hotuba yake, alijenga hoja za kuisemea Rwanda huku akishutumu Waziri Membe kwamba ni chanzo cha kudorora kwa uhusiano kati ya Tanzania na Rwanda.

“Naogopa sana tunapoanza kuonesha tofauti zetu hadharani, malumbano yasiyo na tija kwa ustawi wa nchi yetu ni vyema tusiyazungumze bungeni na mahali pengine popote,” alisema Mwanadiplomasia, Balozi Charles Sanga.

Alisema anaamini watanzania wote wanapenda nchi yao. Alishauri, “Tukiri tujisahihishe, naamini ulimi uliteleza, hivyo tukiri kukosea na tujisahihishe, wajibu wa kutunza na kulinda tunu zetu,(amani, uzalendo, utu) zinalindwa na kuheshimiwa”.

Kwa upande wake, Mhadhiri wa Chuo Kikuu cha Dar es Salaam, Bashiru Ally, alisema siyo jambo la busara wanasiasa kuchochea ugomvi na nchi jirani. Bashiru alisema kufanya hivyo ni kuhatarisha usalama uliopo ndani ya nchi na hata barani Afrika, hivyo kuwa kichocheo cha ukoloni mamboleo.

Alisema ni vyema wanasiasa, wakaacha mara moja siasa uchwara zinazochochea Utaifa finyu, aliosema unalenga kutekelezwa kwa maslahi ya vikundi vya propaganda na vyama vyenye maslahi binafsi.

“Tuangalie siasa za utaifa kwanza, kuliko vyama vyetu na maslahi binafsi, vikundi vya propaganda hapa siyo eneo lake, huwezi kuchezea utaifa, ni kuhatarisha usalama,” alionya Bashiru.

Kuhusu maslahi ya taifa, mhadhiri huyo ambaye ni mtaalamu wa masuala ya Sayansi ya Jamii, alisema zipo aina mbili za kusimamia jambo hilo.

Alitaja kwamba moja ni nchi yenyewe kwa sera na viongozi wake; na pili ni ushirikiano wa wananchi ndani ya nchi husika. Alisema jambo hilo, lilipaswa kufanywa hivyo na siyo kugawanyika bungeni kwenye masuala ya maslahi ya taifa.

“Nataka hawa wanasiasa wajue kwamba hivi sasa vitisho vya usalama vina sura mpya, ikiwemo ya ukoloni, sasa tunapoanza kujigawa wakoloni wanapata nguvu na mfahamu kuwa yapo mataifa yanayopenda kuona mkilumbana na wanaweza kuwasaidia ili mgombane vizuri, iwe rahisi wao kuja,” alisisitiza Bashiru.

Alisema ni vyema wananchi na wanasiasa wasiofahamu, wakajua kuwa Tanzania kupeleka majeshi yake Kongo haikuwa bahati mbaya wala makosa, bali ni jambo jema kwani nchi imekuwa mstari wa mbele tangu zamani kutetea na kuhakikisha ukombozi wa nchi jirani na Afrika kwa ujumla, wanapata uhuru.

“Majeshi yetu yanapokwenda nje ya mipaka ya nchi, siyo jambo baya, ni jema kwa maana Afrika ni moja na ulinzi wa bara hili, unapaswa kufanywa na waafrika na siyo wazungu, tukiwaacha hao wazungu waje kutulinda, nia yao siyo kulinda bali pia kupora rasilimali zetu, walifanya hivyo Kongo”, alifafanua Bashiru.

Aliongeza, sasa nchi ina taswira nzuri ndani na nje ya Afrika, hasa kwa kusaidia ukombozi na usuluhishi wa migogoro na pia kuifanya Afrika kuwa moja, hivyo kuanza kuchokoana wenyewe ni kudhoofisha usalama.

Askofu Msaidizi wa Kanisa Katoliki Jimbo la Bukoba, Method Kilaini alisema siyo vyema Watanzania kuanza kulumbana juu ya utetezi wa maslahi ya nchi.

Alisema Wenje alipaswa kufahamu kwamba watanzania wote, wana wajibu wa kutetea nchi yao popote hasa linalokuja suala la maslahi ya taifa.

“Tusiongeze machungu yaliyopita, suala la M23, sio tatizo tena, lilishakwisha, jambo la msingi hapa ni kutafuta uhusiano mzuri na jirani zetu, tuyamalize, tukae vizuri na siyo kuchochea ugomvi, tukumbuke tuko nao jirani na tunashirikiana kwa njia moja au nyingine, wanasiasa wasiongeze ugomvi", alisisitiza Askofu Kilaini.

Mwingine aliyezungumzia ni Shehe wa Mkoa wa Dar es Salaam, Alhad Mussa alishangaa Watanzania wanaotanguliza maslahi ya nchi nyingine, badala ya nchi yao na kusema ni jambo la kushangaza.

“Tuwe wazalendo na nchi yetu, tuwaambie ukweli watanzania, tusiwapotoshe, tuna wizara husika ya kuzungumza mambo ya uhusiano na mataifa mengine, tuiheshimu, tuiamini, ni chombo chenye mamlaka kamili,” alisisitiza Mussa.

Katika kujibu hoja za Wenje alizotoa bungeni, Waziri Membe katika kuhitimisha mjadala, alieleza kushangazwa na kitendo cha mbunge huyo, kuisemea nchi nyingine bungeni.

Waziri Membe alisema huo ni uchonganishi na unaweza kuifikisha nchi pabaya. Alitaka wabunge na viongozi wengine, kuwa wazalendo na kutetea maslahi ya taifa kwanza.